Deskribapena
Amultsuki Iparraldeko euskaran erabiltzen den hitza da eta zerbait onginahiez eta maitasunez egiten dela esan nahi du.
Txarli eta Joselu kantuan ibiltzen dira han-hemen. Jendartean abesten hainbeste urte eman ondoren, badakite Ipar Euskal Herrian elkarrekin kantuan aritzeko ohitura oso bizirik dagoela oraindik, kantu ederrak badirela han, kantuek jendea batzen dutela eta alde bateko eta besteko euskaldunok batasun horren beharra dugula.
Horregatik, disko honetan Iparraldeko kantuak dira nagusi —zortzi, denera—, baina Benito Lertxundi, Olatz Zugasti eta Patxi Saizen kantu bana ere sartu dute, haiek bezain ederrak direlakoan. Horiexek dira disko honetan Txarlik eta Joseluk amultsuki eskaintzen dizkiguten kantuak, beste ezertarako baino areago, lagun artean kantatzea maite duen jendeari aukera berriak zabaltzeko.
